前排係偶然機會下睇咗畫展。一眼望埋去全部都係一幅幅顏色鮮艷的肉感女孩。女孩是赤裸，但又自在地擺佢喜歡既post，做佢喜歡的事。那一刻我感覺係開心、有動力同自在既。現今社會崇尚瘦就是美，彷彿身上有肉都係罪過。當我地日日努力瘦身既時候，好似又無咩諗過究竟係邊個人去訂瘦就係靚呢套標準。總之無論你係咩膚色、咩年齡、父母係咩身形都好，女仔腰圍最好keep係24吋，體重100磅之內就最perfect。我有時諗，係邊個話瘦就係靚架呢？可以令到全世界既男男女女拼了命去追求呢一套清晰不過既標準，絕對不會有半點懸念。為什麼是清晰不過？因為就只有單一的指標—瘦！咁即係人人都要變做Barbie & Ken 先叫達標，否則你就是loser，靚衫你carry唔到、情人又搵唔到、影相打卡一係你識PS改圖，如果唔係都係無你份。咁我又唔明，其實係人揀衫，定衫揀人呢？如果對方只要你一肥就唔要你，咁佢鍾意既係你個人整體，定係某一部份呢？唔知道大家有否覺得，時下既俊男美女無論樣貌，身型都好相似，因為大家對於美既追求，目標都係好一致的。可能你會問，想靚去做gym瘦身有咩問題？咁其實我又覺得以健康方法令自己身型靚啲，人又自信啲，又真係無咩問題。只不過我會諗咩係靚呢？靚唔靚係人哋話，定係自己點睇先最重要？我有問過自己身體想唔想咁瘦同咁“靚”嗎？ 除左你自己，無人比你同自己身體更親密。可是我地都習慣將自己身體話事權轉交比外人，由人哋決定你點先叫靚。而最可悲既係我哋都總係覺得自己唔夠靚，就係因為無辦法達到那不知由誰而訂既單一標準。我相信唯有你自己先最了解自己身體想點，只要你願意同佢接觸，靜心聽下你身體需要同想法，而當你願意同自己身體親近，自然就散發出那份自信自在的氣息，就係你最靚既一面。
P.S.寫比大家睇，同時都係寫比自己，共勉之！(笑emoji)
文：文ly 圖：https://fb.me/e/4NaCsO5fI 脂脂肪的世界 原畫展
============================
Comments