〈Intimacy Words 親密愛語〉
你會揀一個自己愛還是合適嘅人？
人來人往，相信我哋每個人都會經歷呢一個難題: 如果人生需要選擇，我哋究竟要揀一個自己愛定係合適嘅人？
自己愛嘅人可能會陪自己一齊感受人生中嘅甜酸苦辣，自己想做啲咩就一齊瘋狂去做，咩都一齊去體驗、一齊成長、一齊大笑、一齊痛、一齊喊，經歷好多青春熱血嘅時刻，彼此間無所不談。大家可以一個月食罐頭、麵包去換取一齊去旅行嘅機會，亦會連講三個鐘頭電話後大家仍然有講不完嘅話題。呢一個自己愛嘅人，可能更着重與自己當下嘅靈魂與心靈嘅契合。
合適嘅人可能會陪自己渡過生活每一微細嘅時刻，哪怕係面對柴米油鹽醬醋茶，一齊承擔、建構一個穩定嘅未來，看重嘅係未來。知道你食罐頭、麵包對身體唔好而預先準備好自家製嘅飯餸俾你；生病時知道點樣好好照顧你；唔開心嘅時候知道你需要點樣嘅安慰； 天氣凍嘅時候已經一早為你準備好外套；提及安全感時已經為將來有一系列嘅計劃實行中。
究竟我應該點揀好…？
我哋每一段關係中，無論最後結尾如何，一切嘅經歷都會令我哋更加知道自己真正需要係咩、自己想要一段點樣嘅愛情。
願大家能選擇自己真正喜歡，喜歡自己真正需要，依種愛情可能先值得大家追求。
文：沙漠草原
圖：Canva、”La La Land”
Comments